《教仔有方》 --M23 黑鬼
我最近去咗健康委員會(Health Committee, Medical Society, HKUSU)嘅屋邨服務幫手做helper,同啲街坊呀老人家呀傾吓計咁。 然後嚟咗一個四十歲左右、有兩個仔(大仔四年班細仔得幾歲)嘅媽咪,同佢由傾健康話題傾傾吓變咗講教仔。佢同我分享咗佢教仔嘅大方向,同我阿爸由小學到中學嘅方向都有啲類似。小學嘅時候,喺讀書上,阿爸逼得我好緊,又要我名列前茅,又要我升小四暑假預習小四嘢,總之要求多多又極之嚴格,係不折不扣嘅專制;到咗中學之後,佢依然都有高嘅要求,但係比起小學係輕鬆咗少少嘅。嗰位媽媽都係咁認為,小朋友仲細嘅時候真係要逼緊啲,因為佢哋唔識諗,思想未夠成熟,要專制啲咁幫佢哋做決定,開個好嘅讀書好開始。冇小朋友會鍾意讀書,人天生就鍾意享受、娛樂,而小朋友唔會明白讀書嘅重要性,畀佢哋做決定係對佢哋嘅發展有害,讀書上嘅專制係必然嘅痛苦。喺未成熟嘅階段,小朋友可以話係唔配有自主。但係小朋友開始長大,就要慢慢放手,畀多啲空間佢哋做決定,同時監察住佢哋嘅決定有冇唔啱,睇住佢哋成熟至係成功嘅放手。越成熟,越放心,子女嘅自由越嚟越大。我仲細嘅時候唔識諗,但係到咗大個就開始理解阿爸嘅原因,但係到而家我都係覺得,佢嘅方法唔可以話係錯,然而又唔可以話係好。 總括嚟講,就係:未識諗就專制;開始識諗就開始民主 - 因為唔識諗嘅唔配民主;識諗嘅唔配專制。 跟住有個血壓偏高嘅婆婆嚟咗,我又同佢傾吓計。佢話佢血壓一路都有控制好,有定時覆診食藥,仲話喺樓下嘅民建聯中心好好,每個兩星期都會幫長者免費量血壓。講完健康方面嘅嘢之後,婆婆開始分享佢辛苦嘅生活,淨係領綜援生果金,政府嘅支援唔夠,自己財務上唔理想,生活艱苦,但係佢都好開心有好似我哋咁嘅醫學院學生有心舉辦吓啲健康檢查諮詢,同埋民建聯呀社工姑娘呀都幫吓佢哋呢班長者,覺得都滿意。 馬斯洛需求層次理論講到,人要先滿足咗生理、安全、基本物質嘅層次,然後只會講更高嘅精神層次。當人喺層次金字塔嘅底端已經需要一番嘅掙扎只能夠得到滿足,根本好難邁向更高嘅層次。同阿婆講民主平等自由,講一國兩制點樣迅速畀人蠶食,講政府點樣辦事冇程序,講時事議題,講一地兩檢,阿婆睬你都哂氣啦。唔係話佢哋唔理呢啲事係唔啱,只係佢哋有其他更加逼切,更加貼身嘅生活問題未得到解決,而呢啲嘢唔係民主平等自由能夠帶到畀佢哋,相反係建制派嘅一啲地區工作至能夠帶畀阿婆,切身幫到阿婆,例如係小恩小惠蛇齋餅糉。唔係話老人家唔識諗,只係大家關注嘅嘢真係好唔同,對基層而言,真係正如俗語嘅一句:「唔理白貓定黑貓,捉到老鼠就係好貓」。就係咁,部分市民就停留咗喺需求金字塔嘅底層,冇再向上發展,談精神層次根本冇用。 喺美劇House of Cards裡面,Frank Underwood曾經講過:"The American people don't know what's best for them. I do - I know exactly what they need. They're like little children. We have to hold their sticky fingers and wipe their filthy mouths, teach them right from wrong. Tell them what to think and how to feel and what to want. They even need help writing their wildest dreams, crafting their worst fears." 其實未必係幾流嘅人民就配返幾流嘅民主,睇嚟係政權以及一啲政黨未必真係咁大誘因改善民生。管治大方向真係唔難,只要管治有方,配合裙帶勢力嘅幫助,一切都變得簡單。

啟思啟我思,我思啟啟思。
We inspire our readers to think and readers inspire us to think.

© 2018 Caduceus, The Society Newspaper Editorial Board, Medical Society, The Hong Kong University Students' Union. All rights reserved.