《幸福不需要走多步》 M23 鬼
釋迦牟尼喺29歲嗰陣外出巡遊,佢走出自己嘅舒適圈然後見到四大示相,震撼嘅經歷令佢有所反思,其後出家成道繼而得道覺悟。人總係要有啲跳出舒適圈嘅經歷,至能夠有所觸動、反思。 我早前把握咗個跳出舒適圈嘅機會,去咗健康委員會 (Health Committee, Medical Society, HKUSU) 嘅外展服務:夜晚時份去咗深水埗通州街公園探訪露宿者(當然主辦嘅同學首先確保咗我哋嘅安全)。我本身唔覺得咁嘅service會吸引,但係都膽粗粗咁報咗名,估唔到見識到呢群人會畀到我好強嘅震撼。 佢哋可以話係the unluckiest among the unluckiest,喺現場見到佢哋嘅生活情況雖然同喺媒體上見到嘅影像一樣,但係一切歷歷在目,硬係有種心寒嘅感覺。我哋喺屋企經歷嚴寒酷熱風吹雨打,想飲水可以隨手飲水想食嘢可以隨手食嘢,我哋視之為理所當然嘅嘢佢哋都冇,好難想像自己喺咁嘅環境之下生存。尤其係男性嘅露宿者,露宿嘅決定對於佢哋嘅尊嚴而言真係有好大嘅衝擊。喺咁樣嘅物質、心理環境下生活 (係生活而唔係單單生存),我真係好佩服佢哋嘅堅強堅韌。 其中一個受眾同我哋講到佢點解會喺通州街嘅街頭出現,佢多年前喺廚房工作,不幸發生工業意外,導致要進行腦部手術,而手術嘅後遺症令佢行兩步、講兩句說話都覺得頭暈,根本喪失咗工作嘅能力,不幸一個接一個而嚟,命運將佢帶到嚟今日嘅處境。美國政治哲學家John Rawls提出咗無知之幕 (veil of ignorance) 嘅概念,講到所有人喺出世之前,因為呢塊無知之幕,對自己所擁有嘅地位、技能於當社會嘅情況一概唔知,唔知自己嘅性別、種族、出生地、父母,亦都冇選擇嘅能力,咩都唔知就嚟咗世界,但係出生後又受到自己嘅地位、家庭背景影響而有不均嘅物質分配——簡單啲講,投胎就係一場影響一生嘅隨機遊戲,我哋出世前咩都做唔到但係又畀遊戲嘅結果影響。如果有得揀,冇人會揀做窮人,但係就係呢塊幕,令到有唔公平嘅出現。諗到呢度,我覺得好震撼,我而家係而家嘅我,生活唔算窘迫,但係原來我本身有個隨機嘅機會成為極之貧窮嘅人、露宿者,只係我「冇投錯胎」所以有而家舒適嘅生活。諗到我本來可能都係露宿者,要過不幸嘅生活,我更加對佢哋有一份強烈嘅尊重。 同屋村服務好唔同,今次嘅service唔駛同受眾有深入嘅交流,做返平時嘅嘢就成為咗憐憫同情、過度嘅熱情,而呢啲憐憫同情一定唔係呢班已經放低自己嘅部份尊嚴去露宿嘅人需要嘅嘢,佢哋需要嘅係生存嘅空間、生存嘅尊嚴。我開始諗,如果我係露宿者我會需要啲咩?我只會係想解決當前一餐嘅溫飽。見到一個露宿者即刻開咗我哋送嘅笑口棗嚟食,我明白到我哋嘅服務只係能夠、亦都只係需要為佢哋解決當下嘅燃眉之急,幫佢哋度吓血壓血糖、健康輔導根本唔重要。如果我係佢哋,我一定好需要解決呢餐嘅溫飽。佢哋其實只係唔好彩,我而家提供畀佢哋嘅幫助,就係如果我係佢哋我會想得到嘅幫助。就係無知之幕帶嚟嘅一線之差,我曾經可能好似佢哋咁不幸,而我有今日幸福嘅生活,我亦都已經習以為常,我而家真係深深體會到點解要知足感恩。 好似剛才提到嗰位經歷工傷嘅露宿者一樣,唔少嘅露宿者都係因為種種不幸嘅原因而冇得用自己嘅辛勞換取生活質素嘅改變,佢哋連努力嘅機會都未必有,對比之下,我哋其實已經擁有先天嘅特權,能夠用自己後天嘅努力去換取更多權利、利益。踏上醫護路,我哋已經有較穩定嘅前景,有「用自己後天嘅努力去換取更多權利」嘅權利,然而,隨之而來都有相應嘅義務。有人覺得助人係必然義務,有人覺得係唔一定嘅慈善,但係對於我哋而言,助人只會係必然嘅義務,他日唔好為咗追求更多利益而忘記我哋最基本嘅責任,因為我哋已經喺起跑線上比人更幸福、有更多嘅特權。 希望他朝一日嘅我都可以莫忘初衷。

啟思啟我思,我思啟啟思。
We inspire our readers to think and readers inspire us to think.

© 2018 Caduceus, The Society Newspaper Editorial Board, Medical Society, The Hong Kong University Students' Union. All rights reserved.